رباعيات صلاح جاهين

بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت .. قارب نجاة
قالوا مفيش
غير بس هو الحب قارب نجاه
عجبي !!!

فارس وحيد جوه الدروع الحديد
رفرف عليه عصفور وقال له نشيد

 منين .. منين.. و لفين لفين .. يا جدع
قال من بعيد و لسه رايح بعيد

عجبي !!!

مرات أفوق و يحل عني غبايا 

و أفتكر إني فهمت كل الخبايا 

و افتح شفايفي عشان أقول الدرر
ماقولش غير حبة غزل فى الصبايا

 و عجبي

يا باب يا مقفول ... إمتي الدخول
صبرت ياما واللي يصبر ينول
دقيت سنين ... و الرد يرجع لي : مين ؟
  لو كنت عارف مين أنا كنت أقول
عجبي !!!

ولدى نصحتك لما صوتي اتنبح 

ما تخافش من جني ولا من شبح 

وان هب فيك عفريت قتيل اساله 

ما دافعش ليه عن نفسه يوم ما اندبح   

وعجبي

قالوا السياسة مهلكة بشكل عــام
و بحورها يا بني خشنة مش ريش نعام
غوص فيها تلقي الغرقانين كلهــم
شايلين غنايم .. و الخفيف اللي عـام
وعجبي

أنا شاب لكن عمري ألف عام
وحيد لكن بين ضلوعي زحام 
خايف و لكن خوفي مني أنا
أخرس و لكن قلبي مليان كلام
عجبي